પાકિસ્તાનનું પાણી રોકવામાં કેટલો સમય લાગશે? પાકિસ્તાન પર શું અસર પડશે?

જમ્મુ અને કાશ્મીરના પહેલગામમાં થયેલા હુમલામાં લગભગ 26 નિર્દોષ લોકોના જીવ ગયા. આ દરમિયાન, એક ડઝનથી વધુ લોકો ઘાયલ થયા હતા.

જે બાદ ભારતે પાકિસ્તાનને પાઠ ભણાવવા માટે પાંચ મોટા નિર્ણયો લીધા છે. જેમાં સૌથી નિર્ણાયક નિર્ણય સિંધુ જળ સંધિને સ્થગિત કરવાનો છે. આ નિર્ણય લઈને ભારતે સ્પષ્ટ કર્યું કે જ્યાં સુધી પાકિસ્તાન આ પ્રવૃત્તિઓને સમર્થન આપવાનું ચાલુ રાખશે, ત્યાં સુધી ભારત આ સંધિ ફરીથી લાગુ કરશે નહીં. કેન્દ્ર સરકાર દ્વારા લેવામાં આવેલા આ નિર્ણયને પાકિસ્તાન સામે મોટો ફટકો માનવામાં આવી રહ્યો છે.

આવી સ્થિતિમાં, ચાલો તમને જણાવીએ કે સિંધુ જળ સંધિ સ્થગિત કર્યા પછી ભારત પાકિસ્તાનનું પાણી રોકવામાં કેટલો સમય લેશે?

વાસ્તવમાં, ભારતથી પાકિસ્તાનને મળતો પાણીનો પુરવઠો બંધ કરવો એટલો સરળ નહીં હોય. આનું કારણ એ છે કે ભારત પાસે હાલમાં એવી માળખાગત સુવિધા નથી કે જે આ પાણીને રાતોરાત પાકિસ્તાન પહોંચતા અટકાવી શકે. જો ભારત બંધ બનાવીને અથવા આ પાણીનો સંગ્રહ કરીને આવું કરવાનો પ્રયાસ કરે છે, તો જમ્મુ-કાશ્મીર અને પંજાબ જેવા ભારતીય રાજ્યોમાં ભયંકર પૂર આવી શકે છે.

જો ભારત પાકિસ્તાનની ત્રણ નદીઓનું પાણી રોકી દે તો તેમાં ઘણો સમય લાગવાની શક્યતા છે.

હકીકતમાં, ભારતે આ ત્રણ નદીઓમાંથી મળતા લાખો ક્યુસેક પાણીનો ઉપયોગ કરવા માટે માળખાગત સુવિધાઓ બનાવવી પડશે. પાકિસ્તાનના નિષ્ણાતો પણ આ જ વાત કહી રહ્યા છે. પાકિસ્તાની નેતાઓ તરફથી પણ આવા જ નિવેદનો આવી રહ્યા છે કે ભારત સિંધુ જળ સંધિ હેઠળ તેને મળતું પાણી રાતોરાત રોકી શકે નહીં. આવી સ્થિતિમાં, તે લોકો પાસે ભારતના આ નિર્ણય સામે કાનૂની લડાઈ લડવા માટે પૂરતો સમય છે.

ભારત સિંધુ જળ સંધિ બંધ કરે છે તો..!

પરંતુ તમને જણાવી દઈએ કે જો ભારત સિંધુ જળ સંધિ બંધ કરે છે, તો તેની પાકિસ્તાન પર ભારે અસર પડશે. કારણ કે પાકિસ્તાનના સિંધ અને પંજાબ પ્રાંતમાં 90% ખેતી આ પાણીથી થાય છે. આવી સ્થિતિમાં, જો ભારત દ્વારા આ ત્રણ નદીઓનું પાણી બંધ કરવામાં આવે તો પાકિસ્તાનમાં ખોરાકની સાથે પીવાના પાણી માટે પણ હોબાળો મચશે. પાણીની અછતને કારણે, પાકિસ્તાનની ખેતીલાયક જમીન સુકાઈ જવાની આરે હશે. આ ઉપરાંત, પીવાના પાણી અને વીજળી પ્રોજેક્ટ્સને પણ મોટો ફટકો પડશે.